©2019 by 展群CK ®

公司服務提供者牌照編號 (TCSP Licence): TC000088

誰能在世界盃笑到最後?COVER.jpg

萬眾期待, 四年一度既世界盃又結束啦,相信大家都覺得今屆世界盃非常神奇, 首先有冰島力鬥阿根廷, 令全世界既觀眾都知道冰島人民係幾咁團結, 全班人馬都係兼職踢世界盃。 再者,有好多傳統勁旅,大熱門都入唔到決賽周.美斯C朗更加同一日齊齊係機場gathering, 令好多人大跌眼鏡, 唔知大家睇直播個陣,打爆左幾多部電視機呢?

雖然話爆冷既賽果係會令馬會賠得多,但係其實係開盤既時候, 馬會已經有成班精算師係背後發功。計計個”或然率”再開盤口,所以係唔會存在少林足球入面擲銀仔出現或然率係0既情況。

無論馬會開咩盤口, 都已經計算左佢既利潤係入面, 所以馬會既盤口會不斷郁,就係要對沖番唔同時候既風險。

簡單而言,即係擲到”公”就馬會嬴晒,擲到”字”就馬會嬴你少少。

其實好多人都知馬會係好賺錢,茶餘飯後都會講笑,話如果馬會上市一定訓身咁抽新股。

不過大家又知唔知其實你地投注既時候,其實都間接地交緊稅俾香港稅務局。無論賭馬、賭波定係買六合彩,其實都需要俾博彩稅。

大家成日都話賭輸左錢,就當俾錢馬會鋪草皮, 但係其實呢句話岩一半, 事關唔係所有錢都係俾馬會, 其實有大部分係俾香港稅務局, 所以正式講法係,俾少少錢馬會鋪草皮,再俾多多錢政府起巨型基建, 係咪感覺上偉大好多呢?

係舊年,賽馬納稅部分佔博彩稅超過6成, 足球佔3成,其餘係六合彩。

大家可能會驚訝, 原來大家成日買緊既六合彩,只係佔博彩稅收益少過10%。 原因係六合彩只有獎券活動收益既25%係需要交稅, 而足球係要俾淨投注金收入既 50%。

咁大家估下賽馬要俾幾多?

答案係本地投注淨投注金收入既最少72.5%, 所以D人話去馬會係俾錢鋪草皮,都有佢一定既道理

話晒都係4年一度既世界盃,唔知大家有冇用真金白銀支持愛隊,進貢俾馬會呢?

希望大家係今個世界盃嬴多輸少,不過其實無論輸嬴,馬會同埋稅務局”或成最大嬴家”。

最後都要提醒大家,千萬唔好沉迷賭博呀。正所謂小賭怡情, 大賭唔會變李+x。